Sot, do të luhen ndeshjet e para të fazës “play-off” në kuadër të Ligës së Kampionëve.
Në program janë katër ndeshje, secila më interesante se tjetra dhe do të zhvillohen në dy orare të ndryshme.
Faza “play-off” fillon në Stamboll, me ndeshjen Galatasaray – Juventus, e cila nis nga ora 18:45.
Juventusi fazën e ligës e përfundoi në vendin e 13-të me 13 pikë, ndërsa Galatasaray ishte në vendin e 20-të me 10 pikë.
Të dyja skuadrat kishin synim të jenë në Top-8, por nuk ia dolën dhe tani me anë të fazës “play-off” duan të mbesin pjesë e Championsit.
Ndërkohë, prej orës 21:00 janë tri ndeshje të tjera.
Kampioni në fuqi, Paris Saint-Germaini luan me skuadrën tjetër të Francës, Monaco që është vendas në ndeshjen e parë.
Rivalitet i madh pritet edhe në ndeshjen Borussia Dortmund – Atalanta, por vëmendja kryesore do të jetë në ndeshjen Benfica – Real Madrid.
Benfica e mposhti Real Madridin në mënyrë dramatike në xhiron e fundit të fazës së ligës dhe kështu e nxori ekipin nga La Liga jashtë tetëshes së parë, duke bërë vend për vete në “play-off”.
Golin që solli këtë skenar e shënoi në minutën e 98-të përmes portierit dhe te Real Madridi janë të gatshëm për t’iu revanshuar Benficas.
Jose Mourinho është trajner i Benficas, ku portugezi i njohur ka të kaluar të suksesshme me Real Madridin.
Edhe të mërkurën, do të zhvillohen katër ndeshjet tjera të fazës “play-off” të Ligës së Kampionëve.
