Duele interesante në Ligën e Konferencës

Pas përfundimit të fazës së grupeve të Ligës së Konferencës, janë mësuar skuadrat që do të përballen në fazën e plejofit të kësaj gare.

Shorti për këtë fazë është tërhequr të hënën nga UEFA, ku ishin të përfshira tetë skuadrat e dyta të Ligës së Konferencës dhe tetë të tretat të Ligës së Evropës. Pas përfundimit të kësaj faze, do të tërhiqet shorti për ndeshjet e 1/8 së finales, i cili do të jetë më 23 shkurt të vitit të ardhshëm.

Në fazën e plejofit të Ligës së Konferencës do të ketë ndeshje interesante, të cilat do të luhen më 15 dhe 22 shkurt të vitit të ardhshëm.

Një prej dueleve më interesante, do të jetë ai ndërmjet Real Betisit dhe Dinamos së Zagrebit. Ajaxi do të ketë punë me Bodo/Glimtin e Norvegjisë, ndërsa Eintracht Fraknfurti do të përballet me Union St.Gillosien e Belgjikës. Çiftet tjera të kësaj faze, janë Sturm Graz – Slovan Bratislava, Servette – Ludogorets, Olympiacos – Ferencvaros, Molde – Legia dhe Maccabi Haifa – Gent. Ky është edicioni i tretë i Ligës së Konferencës, ndërsa finalja do të mbahet në Greqi më datën 29 maj.