Faza çerekfinale e Kupës së Kosovës në futboll, do të ketë ndeshje interesante, ku katër prej tetë skuadrave synojnë kalimin në gjysmëfinale të kësaj gare.
Të mërkurën në zyrat e Federatës së Futbollit të Kosovës (FFK), është tërhequr shorti për këtë fazë pasi javën e shkuar ka përfunduar 1/8 e finales.
Tri prej tetë skuadrave të kualifikuara në çerekfinale garojnë në Ligën e Parë dhe për një biletë në gjysmëfinale duhet të eliminojnë kundërshtarët nga Superliga.
Drenica – Ferizaj, Prishtina e Re – Drita dhe Vëllaznimi – Prishtina janë duelet mes ekipeve të Ligës së Parë dhe atyre të Superligës.
Ndërkohë, përballja më interesante e kësaj faze pritet të jetë ajo ndërmjet Malishevës dhe Llapit.
Duelet çerekfinale do të luhen më 26 shkurt, ndërsa edhe në këtë fazë fituesi përcaktohet me vetëm një ndeshje.
