Këngëtarja me famë ndërkombëtare Dua Lipa është përfshirë në një nismë bamirësie që ka sjellë ndihmë konkrete për mjekët ushtarakë në Ukrainë.
Falë një fushate grumbullimi fondesh, ku artistja ka dhënë mbështetjen e saj, është siguruar një automjet pickup që tashmë i është dorëzuar Batalionit të Parë të Veçantë Mjekësor.
Mjeti do të përdoret për evakuime dhe operacione emergjente në zonat e prekura nga lufta.
Automjeti pritet të ndihmojë ekipet mjekësore të lëvizin më shpejt dhe në mënyrë më të sigurt në terren, sidomos gjatë transportimit të të plagosurve në kushte të vështira.
Fondet janë mbledhur gjatë një eventi bamirësie të organizuar nga “Service95”, ndërsa më pas janë transferuar te “Driving Ukraine”, një organizatë që merret me përshtatjen e automjeteve për nevojat e mjekëve dhe forcave në terren.
Në një reagim në rrjetet sociale, pjesëtarë të njësisë mjekësore e kanë cilësuar këtë ndihmë si një surprizë të bukur, duke theksuar se edhe pse mundësia dukej e vogël, ajo u bë realitet.
Kjo nismë vjen si pjesë e angazhimeve të vazhdueshme humanitare që synojnë të mbështesin shërbimet emergjente në Ukrainë, në një kohë kur nevojat në terren mbeten të mëdha./TAR
