Dritan Rexhepi është ekstraduar këtë të mërkurë nga Turqia në Shqipëria nën masa të jashtëzakonshme sigurie.
Në pamjet e bëra publike nga policia duket që ai është pritur në aeroportin në Turqi edhe nga policë shqiptarë të armatosur e të maskuar, ndërsa me dhjetëra efektivë të forcave speciale e kanë pritur atë në Rinas, shkruan A2 CNN.
Ndaj tij është caktuar masa e sigurisë “arrest në burg” për zhdukjen e Jani Prengës, i dënuar me 4 vite burg për falsifikim nga gjykata e Fierit. Në vitin 2013, është dënuar nga Gjykata për Krimet e Rënda, me 25 vjet burgim, për veprat penale “Vrasja me paramendim” dhe “Plagosja e rëndë me dashje”. Në vitin 2010, është dënuar nga Gjykata e Apelit e Firences, Itali, me 16 vjet burgim, për pjesëmarrje në grup të strukturuar kriminal.
Mësohet se ai është dërguar menjëherë në burgun 313 në Tiranë.
Rexhepi, që cilësohet si udhëheqës i kartelit të drogës me emrin “Bello”, kërkohej nga Italia, Belgjika, Spanja dhe Shqipëria nën akuzat për trafik droge nga Amerika e Jugut në Evropë.
Në Shqipëri, Dritan Rexhepi gjithashtu po gjykohet në mungesë në Gjykatën e Posaçme si porositës i rrëmbimit dhe vrasjes së Jan Prengës, në 17 janar të vitit 2020.
I konsideruar si mjeshtri i arratisjeve nga burgjet, në mars të 2006-s, Rexhepi u shpall fajtor dhe u dënua me 25 vjet burgim në mungesë për vrasjen e dy policëve në Fushë-Krujë.
Ai u arratis nga burgjet në Shqipëri, Itali dhe Belgjikë. Në Ekuador vuajti gati 10 vjet burg kur u arrestua në vitin 2014, prej ku edhe ndërtoi perandorinë e trafikut të drogës.
Pas lirimit, iku nga Ekuadori dhe hyri në Turqi me pasaportë false kolumbiane. U arrestua gjatë një operacioni të policisë turke më 10 nëntor 2023.
