Istogu ka potencial të jashtëzakonshëm zhvillimi, por për vite me radhë është përballur me rritje urbane të paorganizuar, e cila në shumë raste ka cenuar tokën bujqësore dhe interesin publik. Si kandidat për deputet, angazhimi im është që zhvillimi i qytetit të bëhet me plan, me ligj dhe me vizion, duke ruajtur atë që është më e vlefshme për Istogun.
Istogu, për nga pozita gjeografike dhe konfigurimi natyror, ka të gjitha parakushtet që me planifikim urban të drejtë të shndërrohet në një qytet me identitet të veçantë arkitektonik dhe turistik, një model zhvillimi që sot e shohim në qytete si Berati apo Korça, të ndërtuara në harmoni me natyrën dhe historinë. Ky potencial, nëse shfrytëzohet me mençuri, mund ta kthejë Istogun në një qytet tërheqës për jetesë, turizëm dhe investime.
Në periferi të qytetit, rrëzë bjeshkëve, ekzistojnë toka publike që administrohen nga Agjencioni Pyjor i Kosovës, të cilat nuk përbëjnë fond pyjor, por janë të mbuluara kryesisht me shkurre dhe sipërfaqe të pashfrytëzuara. Megjithatë, Komuna e Istogut aktualisht nuk ka të drejtë ligjore që të disponojë me këto prona.
Pikërisht për këtë arsye, në rast të zgjedhjes sime si deputet, do ta marrë me prioritet dhe këmbëngulje ndërmarrjen e një nisme ligjore në Kuvendin e Kosovës, me qëllim që të mundësohet ndryshimi i statusit të pronësisë apo administrimit të këtyre tokave, në mënyrë që ato të kalojnë nën kompetencën e Komunës së Istogut.
Qëllimi i kësaj nisme ligjore është i qartë dhe i matshëm:
1. Të mundësohet shtrirja e planifikuar e qytetit drejt zonave kodrinore
2. Të ruhen tokat bujqësore për bujqësi dhe prodhim vendor
3. Të parandalohet ndërtimi i egër dhe kaosi urban
Pas përfundimit të procesit ligjor, Komuna e Istogut do të kishte mundësi që këto prona t’i planifikojë urbanisht dhe t’i ndajë në parcela të rregulluara, të cilat do t’u ofroheshin qytetarëve përmes shpalljeve publike transparente, me të drejtë shfrytëzimi afatgjatë deri në 99 vjet.
Paraprakisht, Komuna do të investonte në infrastrukturën bazë:
– rrugë të rregulluara
– ujësjellës dhe kanalizim
– energji elektrike dhe ndriçim publik
Ky model zhvillimi krijon lagje të reja të planifikuara, me pamje të bukur drejt bjeshkëve, rrit cilësinë e jetës për qytetarët dhe njëkohësisht mbron tokën bujqësore dhe mjedisin.
Si deputet, do ta përdor mandatin tim për ta kthyer këtë vizion në realitet dhe interes publik për qytetarët e Istogut.
Artikull i sponsorizuar
