Në prani të kryetarit të Komunës së Gjilanit, Alban Hyseni, bashkëpunëtorëve e sponzorëve si dhe gazetarëve, kampionia e Kosovës ka organizuar darkën e fundvitit tashmë tradicionale për të falënderuar për bashkëpunimin gjatë këtij viti.
Drejtuesit e klubit gjilanas të shquar për organizim të lartë e kanë shndërruar këtë manifestim në një traditë, e cila në fund të vitit mbledh të gjithë ata që e përcollën, mbështetën dhe ndihmuan klubin gjilanas.
Në një fjalim të shkurtër, drejtori sportiv i Dritës Valon Zymberi ka kujtuar vitin më të rëndësishëm të klubit, kur siguroi pjesëmarrjen në Ligën e Konferencës duke bërë histori jo vetëm me pjesëmarrje, por edhe me rezultate të arritura në fushë. Drita ka siguruar fazën e plejofit në garën evropiane dhe do të luaj edhe në fillim të vitit në Conference League, kundër Celjes apo AZ Alkmaar.
Kryetari i komunës së Gjilanit, Hyseni për të pranishmit tha se klubet e Gjilanit kanë sfidë të madhe mungesën e stadiumit, për të cilin e dha një premtim jo fort bindës, se mund të jetë gati brenda një viti.
“Mbrëmë, FC Drita mbylli një vit të jashtëzakonshëm, 2025, me ndejën tradicionale të fundvitit së bashku me media, sponsorë dhe bashkëpunëtorë të klubit.
Një vit suksesi, përkushtimi dhe arritjesh të mëdha — falë mbështetjes së vazhdueshme të secilit prej jush”, ka shkruar Drita në Facebook.
