Të mërkurën mbrëma, kampionia e Kosovës në futboll, Drita ka mësuar kundërshtarin e radhës në kualifikimet e kupave evropiane.
Pas eliminimit nga Liga e Kampionëve, Drita rrugëtimin evropian do ta vazhdojë në Ligën e Evropës, përkatësisht raundin e tretë kualifikues të kësaj gare.
Në këtë raund, Drita do të përballet me Steaua Bukureshtin, kampionin e Rumanisë, i cili u eliminua nga Shkëndija e Tetovës në Ligën e Kampionëve.
Ndeshja e parë ndërmjet Steauas dhe Dritës, do të luhet më 7 gusht në Bukuresht kurse ajo e kthimit pas një jave në stadiumin “Fadil Vokrri” në Prishtinë.
Drita, garimin evropian këtë sezon e nisi nga raundi i parë kualifikues i Championsit, në të cilin eliminoi Differdagen e Luksemburgut, përpara se të eliminohet nga Copenhageni në raundin e dytë me rezultatin e përgjithshëm 3:0.
Nëse, skuadra kosovare e kalon Steauan, avancon në “play-off” të kësaj gare dhe siguron fazën e grupeve të Ligës së Konferencës.
Në rast të eliminimit nga rumunët, atëherë Drita do të paraqitet në “play-off” të Ligës së Konferencës.
