Drita ka fituar ndaj Llapit në kuadër të xhiros së 23-të të elitës së futbollit të Kosovës.
Të shtunën në terrenin me bar sintetik në Gjilan, Drita mposhti Llapin me rezultatin 2:0.
Për Dritën që ka dy humbje në stinorin pranveror, ishte fitorja e tretë në pesë ndeshje, ndërsa Llapi e pësoi edhe disfatën e dytë rresht, krahas tri fitoreve.
Kapiteni i Llapit, Kushtrim Shabani shënoi autogol në minutën e 47-të, ndërsa për 2:0 realizoi Almir Ajzeraj, në minutën e tretë të shtesës.
Me këtë fitore, Drita tani shkon në kuotën e 47 pikëve, kurse Llapi mbetet me 29 pikë në mesin e tabelës.
Në xhiron e ardhshme, Drita luan derbin ndaj Ballkanit në Suharekë, teksa Llapi i shkon Ferizajt.