Kampionia e Kosovës në futboll, Drita, ka udhëtuar në Andorrë me synimin për të arritur një tjetër sukses në Ligën e Konferencës.
Mirëpo, për ta siguruar paraqitjen e dytë rresht në fazën e ligës të Ligës së Konferencës, Drita duhet ta kalojë ekipin nga Andorra, Inter d’Escaldes.
Me fitore në ndeshjen e kthimit që luhet sonte nga ora 19:00, Drita do ta siguronte fazën e ligës pasi ky është dueli i kthimit i fazës “play-off”.
Ndeshja e parë, e luajtur javën e shkuar në Prishtinë, ka përfunduar 2:2 dhe Dritës patjetër i duhet fitorja në udhëtim për të qenë pjesë e Ligës së Konferencës për sezonin 2026/27.
Trajneri i Dritës, Ardian Nuhiu në konferencën për shtyp ka thënë se pret një paraqitje sa më të mirë të ekipit të tij dhe sigurisht kalimin në fazën e ligës.
Nuhiu ka shtuar se beson në cilësinë e skuadrës së tij, duke thënë se grupi i bashkuar do të triumfojë sërish.
Optimizmin e tij para duelit të dytë, e ka shprehur edhe sulmuesi Arb Manaj, i cili ka insistuar se Drita vlerësohet favorite ndaj Interit, por ka thënë se kjo nuk garanton suksesin.
Drita në sezonin e kaluar pati paraqitje të mira në fazën e ligës dhe përfundoi në pozitën e 20-të me tetë pikë, që ia siguroi avancimin në plejofin e fazës nokaut.
