Drita ka arritur fitore përballë Ulpianës që është duke luftuar për mbetje në elitën e futbollit të Kosovës. Gjilanasit të shtunën gjatë ditës në stadiumin “Sami Kelmendi” në Lipjan, fituan me rezultatin 3:2.
Ishin vizitorët që kaluan në epërsi në minutën e pestë të ndeshjes nëpërmjet Muharrem Jasharit. Vendësit barazuan shifrat me Ermir Rezin në minutën e 20.
Pesë minuta më vonë, Marko Simonovski ktheu epërsinë e mysafirëve. Pjesa e parë u mbyll në mënyrë dramatike, kur Akil Makolli i barazoi shifrat në minutën e 43-të.
Në pjesën e dytë, Marko Simonovski e shënoi edhe një tjetër gol për skuadrën e Dritës, dhe të dytin personal. Ishte edhe goli i fitores në minutën e 59-të.
Drita pas 27 xhirove ka 49 pikë. Ulpiana mbetet në pozitën e nëntë (të parafundit), me 24 pikë gjithsej.
