Klubi futbollistik Drita ka vazhduar me ecuri pozitive në Superligë, derisa në dhjetë xhiro është skuadra e vetme që nuk di për humbje.
Ekipi nga Gjilani tani edhe e ka forcuar pozitën e parë në tabelë, pasi të shtunën triumfoi në shtëpi ndaj Trepçës ’89 me rezultatin 3:1.
Kjo ndeshje u zhvillua në fushën me bari sintetik në Gjilan, dhe e hapi xhiron e dhjetë të Superligës së Kosovës në futboll.
Me këtë triumf, Drita mbetet në krye të tabelës me 24 pikë të shënuara.
Me të filluar ndeshja, Drita arriti ta zhbllokoi rezultatin me mesfushorin Muharrem Jashari.
Jashari shënoi në minutën e shtatë me një gjuajtje të saktë prej rreth 17 metrave. Ky gol ishte edhe i mjaftushëm për Dritën që shkoi në pushim me epërsinë 1:0.
Të besuarit e Ardian Nuhiu edhe në pjesën e dytë, gjetën rrjetën plot dy herë.
Drita e dyfishoi epërsinë në minutën e 54-të, nëpërmjet mbrojtësit të krahut, Besnik Krasniqit.
Krasniqi shënoi nga penalltia, të cilën arbitri kryesor e dha vetëm pasi u konsultua me sistemin VAR. Në fakt gjyqtari i ndeshjes, e anuloi golin e Trepçës ’89 në minutën e 50-të për ta dhënë penalltinë për Dritën.
Ndërkohë fitoren Dritës ia vulosi rezervisti Ardit Tahiri (70’) që përfitoi nga një moskoordinim i mbrojtësit dhe portierit kundërshtar, për të trefishuar epërsinë e skuadrës vendase.
89-shit, iu analua edhe një gol në këtë përballje. Në minutën e 80-të, shënoi Adonis Shala, por ishte në pozitë jashtë loje.
Megjithatë, 89-shi e shënoi golin e nderit në minutën e tretë të kohës shtesë nëpërmjet kapitenit Ardian Muja që shënoi nga afërsia pas asistimit të sulmuesit Christian Mba.
Me këtë humbje, Trepça ’89 mbetet në kuotën e nëntë pikëve të tubuara pas tetë ndeshjeve që ka të zhvilluara deri më tani.