Skuadra e Dritës ka fituar ndeshjen e mbetur ndaj Suharekës për ta rrëmbyer pozitën e parë në tabelë.
Të mërkurën në Gjilan, Drita triumfoi me rezultatin 4:2 ndaj Suharekës në ndeshjen që i takoi xhiros së tretë por që ishte shtyrë për shkak të angazhimit të gjilanasve në kualifikimet evropiane.
Drita u tregua skuadër më e fortë dhe pjesën e parë e mbylli në avantazh 1:0, falë golit të shënuar nga Arb Manaj në minutën e 40-të.
Blerim Krasniqi shënoi dy gola dhe një tjetër e realizoi Albert Dabiqaj në pjesën e dytë për Dritën, ndërsa për Suharekën shënuan Liridon Fetahaj dhe Alden Skrijelj.
Për Dritën, kjo është fitorja e 8-të këtë sezon në 13-të ndeshje, e cila ka bërë të shkëputet në krye të tabelës me 28 pikë , tri më shumë se Ballkani që zë vendin e dytë.
Ndërkohë, Suhareka mbetet në kuotën e 18-të pikëve dhe në pozitën e pestë në tabelë.
