Fati i dy skuadrave nga Kosova, Dritës dhe Ballkanit në garat evropiane, do të vendoset sot në mbrëmje.
Si Drita ashtu edhe Ballkani, i luajnë ndeshjet e kthimit në kuadër të raundit të tretë kualifikues të Ligës së Konferencës.
Ndeshjet e para, të luajtura javën e shkuar, të dyja skuadrat i kanë humbur me rezultatin identik.
Drita pësoi në Letoni 1:0 nga Auda, ndërsa Ballkani u mposht në Prishtinë nga Larne, po ashtu 1:0.
Kështu që, si Drita ashtu edhe Ballkani synojnë përmbysjen në ndeshjet e kthimit dhe kualifikimin në play-offin e Ligës së Konferencës.
Drita luan në stadiumin “Fadil Vokrri” në Prishtinë me ekipin nga Letonia, Auda kurse Ballkani përballet me Larnen në Irlandë të Veriut.
Dueli Drita – Auda nis në orën 20:00, ndërsa Larne – Ballkani starton prej orës 21:00.
Optimizmi është i madh te skuadrat kosovare për ta kaluar edhe këtë raund, pasi avancimi në play-off do të thotë vetëm një kundërshtar larg kualifikimit në fazën e grupeve të Ligës së Konferencës.
Për dallim prej Ballkanit që është paraqitur dy herë në fazën e grupeve të kësaj gare, Drita për herë të parë po synon të luaj në fazën grupore.
