Xhiroja e 21-të e Superligës së Kosovës në futboll, do të vazhdoj këtë mesjavë, me tri ndeshje të mërkurën dhe dy të tjera të enjten.
Të trija ndeshjet që do të luhen të mërkurën, janë tejet interesante për shkak se përballen skuadrat që janë afër njëra tjetrës në tabelë.
Megjithatë, e gjithë vëmendja në këtë xhiro do të jetë në qytetin e Gjilanit. Në stadiumin me bari sintetik, të mërkurën prej orës 13:00, do të përballen Drita me Ballkanin, kampionin në fuqi.
Kjo ndeshje është shumë e rëndësishme për të dyja skuadrat, duke pasur parasysh se si Drita ashtu edhe Ballkani po luftojnë për titullin e kampionit.
Aktualisht, Ballkani është lider në tabelë me 44 pikë, shtatë më shumë se skuadra e Dritës që renditet e treta. Megjithatë, Ballkani në këtë ndeshje futet pas barazimit befasues në xhiron e shkuar, ku luajti 2:2 në shtëpi me Feronikelin ’74.
Në anën tjetër, Drita vikendin e shkuar triumfoi 1:0 në udhëtim te Liria e Prizrenit për ta kompensuar humbjen nga Llapi në xhiron e parë të stinorit pranveror.
Në dy ndeshjet e stinorit vjeshtor, të dyja skuadrat shënuan nga një fitore ndaj njëra tjetrës. Drita triumfoi 2:1 në Gjilan, ndërsa Ballkani iu revanshua duke fituar 1:0 në Suharekë.
Të mërkurën, do të zhvillohen edhe dy ndeshje tjera, të cilat po ashtu janë interesante dhe startojnë në orën 13:00. Skuadra e Prishtinës do të synoj të vazhdoj me rezultate pozitive edhe në këtë xhiro, ndonëse përball do ta ketë një kundërshtar tejet të papërshtatshëm.
Në stadiumin “Sami Kelmendi” në Lipjan, Prishtina e pret skuadrën e Malishevës. Në tabelë, Malisheva është më lartë se Prishtina. Zë vendin e katërt me 32 pikë të mbledhura, dy më shumë se Prishtina që renditet e pesta dhe në pranverë nuk di për humbje.
Ndërkohë, në stadiumin “Rexhep Rexhepi” në Drenas, do të luhet derbi i skuadrave që po luftojnë për mbijetesë, Feronikelit ’74 dhe Gjilanit.
Nikli në këtë duel futet pas pikës së fituar ndaj Ballkanit, ndërsa Gjilani pas barazimit 1:1 në shtëpi kundër Prishtinës. Sa i përket renditjes në tabelë, Feronikeli ’74 ka 22 pikë dhe zë vendin e shtatë, ndërsa Gjilani është i teti më 22 pikë të grumbulluara.
Kjo xhiro, do të mbyllet të enjten me dy ndeshje në program, të cilat startojnë në orën 13:00, po ashtu.
Në Klinë, saktësisht stadiumin “18 Qershori”, Dukagjini përballet me Lirinë e Prizrenit.
Dukagjini shihet favorit në këtë ndeshje, duke pasur parasysh se Liria është e fundit në tabelë dhe i ka humbur dy ndeshjet e para në pranverë.
Po ashtu, edhe Llapi vlerësohet favorit në ndeshjen që e luan në udhëtim kundër skuadrës së Fushë Kosovës. Kjo përballje luhet në Lipjan dhe Llapi synon fitoren e tretë në po aq ndeshje të luajtura në stinorin pranveror.
