Analisti politik Xhavit Drenori ka vlerësuar se zgjedhjet parlamentare të 7 qershorit ishin të panevojshme, duke argumentuar se rezultati i tyre nuk solli ndryshime të mëdha në skenën politike të vendit.
Duke folur në emisionin “Info Nata” në Tëvë1, Drenori tha se dalja e ulët e qytetarëve në votime dhe rënia e numrit të votuesve tregojnë se zgjedhjet nuk prodhuan një realitet të ri politik.
Ai u shpreh se zgjedhjet u nxitën nga partitë opozitare pas largimit të presidentes Vjosa Osmani nga Lëvizja Vetëvendosje dhe përkeqësimit të raporteve të saj me kryeministrin në detyrë, Albin Kurti.
Sipas Drenorit, opozita kishte llogaritur se Osmani mund t’i shkaktonte dëm elektoral Vetëvendosjes, por kjo nuk ndodhi.
“Unë shpresoj që kësaj here të ketë një zgjidhje dhe të mos shkohet përsëri në zgjedhje. Duhet të gjendet kompromisi, sepse zgjedhjet nuk do të prodhojnë rezultat tjetër. Qytetarët ose nuk po votojnë, ose po votojnë njëjtë, ndërsa ky votim i njëjtë nuk po prodhon diçka ndryshe”, ka deklaruar Drenori.
Ai shtoi se momenti i vetëm i ri politik ishte largimi i Osmanit nga Vetëvendosje, por sipas tij, pritjet se ajo do të ndikonte negativisht në rezultatin e partisë së Kurtit nuk u realizuan.
“Në realitet, Vjosa Osmani nuk i bëri dëm Vetëvendosjes. Madje, unë mendoj se i ka bërë dëm të madh LDK-së. Opozita mendoi se kishte gjetur elementin që do ta dëmtonte Kurtin, por kjo kartë iu dogj”, u shpreh ai.
Drenori vlerësoi se pas certifikimit të rezultateve zgjedhore do të bëhet më e qartë përbërja e Kuvendit, ndërsa shtoi se Lidhja Demokratike e Kosovës ka ende punë për të bërë brenda strukturave të saj.
