Analisti politik, Xhavit Drenori, ka kritikuar ashpër bllokadën politike të krijuar nga partitë në Kuvendin e Kosovës, duke thënë se vendi është futur në një situatë të neveritshme dhe qesharake, që po e zhgënjen çdo ditë e më shumë qytetarin.
Drenori u shpreh se as vetë subjektet politike nuk e kishin parashikuar që do të ‘rrëshqisnin’ në këtë krizë, ndonëse sipas tij, deputetët e nisën me vetëdije bllokimin e punës së Kuvendit.
“As vetë subjektet politike nuk e kanë besuar që vijnë në këtë situatë. Po ta dinin, pa përjashtim nuk do ta lejonin të ndodhte. E kanë nisur me vetëdije, por nuk e kanë kuptuar se ku do të çonte kjo”, tha ai në emisionin “Këndi i Debatit” në Tëvë1.
Sipas tij, kjo papërgjegjësi politike ka bërë që qytetarët të humbin interesin për proceset parlamentare dhe të refuzojnë t’i ndjekin seancat e Kuvendit, të cilat po mbahen çdo 48 orë pa ndonjë rezultat konkret.
“Kjo situatë i ka bërë deputetët qesharakë, të neveritshëm. Tash kur vjen koha e këtij 48-orëshi, qytetarët e ndërrojnë kanalin, sepse e dinë se çfarë do të ndodhë”, deklaroi Drenori.
Drenori shton se, edhe pse forma e bllokadës është teknikisht brenda rregullave të demokracisë, ajo është moralisht dhe politikisht e papranueshme për qytetarët që presin zgjidhje.
“Kjo situatë është e neveritshme dhe e papranueshme. Kemi të bëjmë me një klasë politike të papërgjegjshme. Ani pse në aspektin rregullativ janë brenda rregullave të ‘lojës’, sepse demokracia ka rregulla”, u shpreh analisti.
Kuvendi i Kosovës ka dështuar tashmë 31 herë radhazi të konstituohet, me mungesë të kuorumit dhe refuzim për të marrë pjesë në votime nga shumë deputetë, duke e lënë vendin në një ngërç politik./teve1.info/
