Sikurse dy xhirot e para, edhe xhiroja e tretë e Superligës së Kosovës në futboll nis të premten.
Ndeshja hapëse e kësaj xhiroje, do të jetë ajo ndërmjet Drenicës dhe Ballkanit, e cila luhet në stadiumin “Bajram Aliu” në Skenderaj me fillim nga ora 16:30.
Pritet të jetë kjo një përballje interesante, me rivalitet të madh pasi të dyja skuadrat do ta kërkojnë fitoren në këtë duel.
Drenica synon fitoren e parë këtë sezon pasi në dy xhirot e shkuara ka barazuar me Dukagjinin dhe Malishevën, duke tubuar dy pikë.
Në anën tjetër, Ballkani pas humbje në xhiron e parë nga Prishtina, ka reflektuar me fitore ndaj Vushtrrisë dhe tani kërkon fitoren e dytë rresht në Superligë.
Gjithashtu, kjo përballje pritet të ketë edhe shikues në tribuna pasi gjithashtu është edhe ndeshja e parë e xhiros së tretë të elitës së futbollit kosovar.
