Drejtoria e Arsimit në Prishtinë u ka kërkuar të gjitha institucioneve arsimore publike të kryeqytetit që, krahas flamurit të Republikës së Kosovës, në hyrjet kryesore të shkollave të vendosin edhe flamurin e Ushtrisë Çlirimtare të Kosovës.
Në shkresën zyrtare drejtuar drejtorëve të institucioneve arsimore, theksohet se UÇK-ja është pjesë e historisë së çlirimit të Kosovës, ndërsa lufta dhe sakrifica e saj për lirinë e vendit përshkruhen si një kapitull i rëndësishëm i historisë së re të Kosovës.
Sipas Drejtorisë së Arsimit, vendosja e flamurit të UÇK-së në hapësirat shkollore lidhet me pasqyrimin e historisë së rrugëtimit të Kosovës drejt lirisë.
Në shkresë thuhet gjithashtu se institucionet arsimore nuk janë vetëm hapësira ku nxënësit marrin dije, por edhe vende ku formohet kujtesa historike dhe qytetare e brezave të rinj.
“Liria që gëzojmë sot ka një histori. Dhe ajo histori duhet të kujtohet, të respektohet dhe t’u përcillet brezave që vijnë”, thuhet në shkresën e Drejtorisë së Arsimit.
Drejtoria ka kërkuar që vendosja e flamurit të UÇK-së të bëhet në mënyrë dinjitoze dhe të njëtrajtshme në të gjitha institucionet arsimore publike të kryeqytetit./teve1.info/
