Drejtori i Përgjithshëm i Policisë së Kosovës, Gazmend Hoxha, në ceremoninë e diplomimit të gjeneratës së 62-të të Policisë së Kosovës, ka folur për rastin tragjik të ndodhur në Lipjan, ku një 27-vjeçar, Agon Zejnullahu, ka humbur jetën në duart e pesë zyrtarëve policorë.
Hoxha theksoi se nuk do të lejohet asnjë tejkalim i autorizimeve policore dhe kërkoi hetim të plotë të rastit nga Inspektorati Policor i Kosovës, hetimet e brendshme të Policisë dhe institucionet e tjera përgjegjëse.
“Nga pozita e drejtorit të Policisë s’do të lejojmë çfarëdo forme të tejkalimit të autorizimeve policore. Kërkoj fuqishëm që të përdoren të gjitha burimet e nevojshme për të hetuar rrethanat e vdekjes së qytetarit tonë”, u shpreh Hoxha.
Ai shtoi se hetuesit policorë janë udhëzuar të bashkëpunojnë ngushtë me IPK-në për të siguruar një pasqyrë të qartë të asaj që ka ndodhur natën kritike në Lipjan.
“Do të ndërmarr të gjitha veprimet ligjore bazuar në rezultatet e një hetimi të plotë”, përfundoi Hoxha.
