“Nuk kërkojmë hakmarrje por drejtësi”.
“Jo dhunë, duam paqe për Agonin”
Me këto pankarta në duar u nisën drejt stacionit policor në Lipjan.
Familjarë e miq të Agon Zejnullahut që vdiq në duart e Policisë te hënën, protestuan duke kërkuar drejtësi për të.
Vëllau i të ndjerit, Albani kërkoi nga institucionet hetim të plotë, transparencë e përgjegjësi.
“Jemi këtu sepse dhimbja e familjes së Agonit është dhimbja jonë kolektive. Sepse heshtja vret për herë të dytë. Agoni nuk është vetëm një emër. Ai është simbol i një padrejtësie që nuk guxon të harrohet. Ai është kujtim që na bën të mos mbyllim sytë. Ai është dhimbje që kërkon të më vetën. Kërkojmë hetim të plotë dhe transparent. Kërkojmë përgjegjësi. Kërkojmë ligj e jo justifikime institucionale”, deklaroi vëllai i Agonit, Alban Zejnullahu.
Ai tha se nuk do të ndalen deri në zbardhjen e plotë të këtij rasti.
“Drejtësi për jetë që nuk duhet të ishin shuar. Nuk do të ndalemi. Nuk do të harrojmë. Deri në ditën kur drejtësia të flas, ne do të vazhdojmë ta kërkojmë me dinjitet e me guxim”, tha ai.
Prindërit e motra e të ndjerit u panë në gjendje të rënduar emocionale teksa ai lexonte fjalimin.
Derisa një nga miqtë e familjes krahasoi zyrtarët policorë me ata të kohës së ish-regjimit serb.
“Policinë nuk ka njeri gjak shqiptari që nuk i do. Ama milicinë i urrejnë deri në pikën e fundit. Siç po duket kohët e fundit kanë filluar disa të shndërrohen në milic. E milicët dihet të kujt kanë qenë, të Sllobodan Millosheviqit…Nëse edhe këto gjëra i mohohen këtij populli, ne nuk do të ndalemi derisa të vihet drejtësia në vend. Se për disa gjëra po shihet se kush e ka kapur pushtetin në dorë”, tha miku i familjes, Mirlaim Limani.
E dikush nga ta pati kritika ndaj zyrtarëve policorë të arrestuar për vdekjen e 27-vjeçarit.
Agon Zejnullahu dyshohet se u vra nga pakujdesia gjatë arrestimit nga zyrtarët policorë, ndaj pesë të cilëve tashmë është caktuar masa e paraburgimit prej një muaj.
