Morgan McSweeney, shefi i kabinetit të kryeministrit britanik Keir Starmer, dha dorëheqjen nga pozicioni i tij si ndihmësi më i ngushtë i liderit të Partisë Laburiste, për shkak të zemërimit publik lidhur me emërimin e Peter Mandelson si ambasador i Mbretërisë së Bashkuar në SHBA.
Vendimi për Mandelson u kontestua për lidhjet e tij me ish-financierin Jeffrey Epstein.
Në një deklaratë, McSweeney tha se merrte “përgjegjësinë e plotë” për këshillën që i kishte dhënë Starmer për emërimin e Mandelson. Ai e përshkroi vendimin si të gabuar dhe si diçka që kishte dëmtuar besimin tek Partia Laburiste.
“Pas reflektimit të kujdesshëm, kam vendosur të jap dorëheqjen nga qeveria. Vendimi për të emëruar Peter Mandelson ishte i gabuar. Ai ka dëmtuar partinë tonë, vendin tonë dhe besimin në politikë. Kur më pyetën, e këshillova kryeministrin të bënte atë emërim dhe marr përgjegjësi të plotë për këtë këshillë. Në këto rrethana, e vetmja rrugë e ndershme është të tërhiqesh”, tha McSweeney.
Starmer e falënderoi McSweeney-n për kontributin e tij të gjatë.
“Ka qenë një nder të punoj me Morgan McSweeney për shumë vite. Ai e ktheu partinë tonë pas një prej humbjeve më të këqija dhe luajti një rol qendror në fushatën tonë zgjedhore. Falë përkushtimit dhe lidershipit të tij, fituam një shumicë dërrmuese dhe kemi mundësinë të ndryshojmë vendin”, tha Starmer, transmeton RTSH.
Megjithatë, largimi i McSweeney nuk duket se do të ulë presionin mbi Starmer, pasi publikimi i qindra mijëra dokumenteve që lidhen me Mandelson dhe Epstein.
