Vrasja e rreshterit Muhamed Lika tronditi Kosovën.
Për këtë rast, shtatë persona të cilët dyshohen se e planifikuan dhe e realizuan vrasjen, ndodhen tashmë në paraburgim.
Dosja e prokurorisë ka zbardhur shumë detaje, për vrasjen që ndodhi në qendër të Kaçanikut.
I ndjeri me ta përfunduar punën, në ora 22:50 minuta ishte nisur për në banesën e tij.
Përgjatë gjithë kësaj kohe, ai ishte nën përcjelljen e grupit që dyshohet se ekzekutoi vetëm pak minuta më vonë.
“I pandehuri Haki Bela pasi që kishte qëndruar në lokalin e tij, prej aty niset në drejtim të Stacionit Policor ku përballë kalohet me viktimën Muhamet Lika, pastaj viktima vazhdon në drejtim të banesës, ndërsa i pandehuri Haki vazhdon drejt rrugës ‘UÇK’ për 20 metra dhe pas 30 sekondave kthehet në drejtim të viktimës”, thuhet në dosjen e Prokurorisë.
Në dosje tregohet në detaje roli që kishin të dyshuarit e tjerë.
Në mesin e tyre ishte edhe Edmond Lika, për të cilin Tëvë1 ka mësuar se është i afërm i viktimës.
“Të pandehurit Shkëlqim Kuka dhe Edmond Lika vëzhgojnë rrugëtimin e viktimës, ku nga vetura “Opel Astra” me të kaluar viktima përreth veturës në drejtim të banesës, del nga vetura Edmond Lika dhe hip në veturën ‘Golf 2’ duke e vozitur të njëjtën me drita të fikura dhe duke vazhduar në rrugën një drejtimëshe duke përcjellë viktimën në drejtim kah ka lëvizur. Ndërsa vetura ‘Opel Astra’ nga ky moment merr veprimin dhe vazhdon duke shkuar afër vendit të ngjarjes”, thuhet tutje në dosje.
Sipas organit ndjekës, pas kryerjes së aktit, të pandehurit bëhen bashkë në një lokacion të caktuar.
“Vërehet i mituri duke u kthyer me vrap prapa nga kishte ardhur dhe duke ikur në drejtim të lokalit ‘Dukagjini’, ku bashkohet me të pandehurin Rilind Murati i cili kishte qenë duke e pritur dhe së bashku largohen. Praprakisht vërehet se i mituri R.B bashkë me dy të pandehur dhe lëvizjes së të pandehurve tjerë, derisa pas vrasjes i pandehuri Diamant ka ndihmuar Belën të largohet nga vendi i ngjarjes”
Në këtë dosje, tregohet gjithashtu se i pandehuri Haki Bela vetëm 14 minuta pas aktit, ka shkuar në vendin e krimit ku ka qëndruar dy minuta dhe më pas është larguar nga vendi i ngjarjes.
E gjithë ngjarja është e regjistruar në kamerat e sigurisë, të cilat janë pronë të stacionit policor të Kaçanikut dhe të bizneseve përreth.
