Kryeministri japonez Shigeru Ishiba njoftoi sot dorëheqjen e tij pas më pak se një viti në detyrë.
Ishiba ishte përballur me kritika dhe thirrje në rritje për të dhënë dorëheqjen brenda Partisë së tij Liberal Demokratike (LDP) pas humbjes së shumicës së partisë në parlament.
Ai deklaroi se synon të përmbushë detyrat e tij derisa të zgjidhet një udhëheqës i ri i partisë.
Koalicioni i kryeministrit Ishiba, i përbërë nga LDP dhe partneri i saj i vogël “Komeito”, humbi shumicën në Dhomën e Lartë të parlamentit në korrik, pasi kishte humbur tashmë shumicën në Dhomën e Ulët më të fuqishme në tetor.
Që atëherë, koalicioni i kryeministrit Ishiba ka vepruar si një qeveri minoritare.
“Edhe pse Ishiba, fillimisht deklaroi pas dështimit të zgjedhjeve të Dhomës së Lartë se kishte ndërmend të qëndronte në detyrë, një numër gjithnjë e në rritje anëtarësh nga partia e tij, e cila ka qeverisur pothuajse vazhdimisht për dekada, kanë bërë thirrje që ai të marrë përgjegjësi”, sipas raportimeve të medias.
Ishiba ka qenë në detyrë që nga tetori i vitit 2024.
