Forma e mirë këtë sezon që Donis Avdijaj ka treguar te Hartbergu në Austri, ka bërë që për sulmuesin nga Kosova, të interesohen disa skuadra.
Avdijaj ka kontratë deri në fund të këtij sezoni me Hartbergun, ekip për të cilin ka shënuar 11 gola dhe ka bërë 14 asistime në 32 ndeshje të luajtura.
Mësohet se skuadra nga Championshipi i Anglisë, Hull City dhe ekipi amerikan Orlando City, kanë shprehur interesim për Avdijajn, i cili po monitorohet edhe nga disa skuadra të Bundesligës austriake dhe asaj gjermane.
Gjatë karrierës, Avdijaj 28-vjeçar ka ndërruar shumë skuadra kurse ka luajtur në Zvicër, Qipro, Holandë, Skoci, Turqi e Gjermani.
Ai, gjithashtu ka edhe 6 ndeshje të luajtura për Kombëtaren e Kosovës, ku ka shënuar 2 gola.
