Spanja ka njohur pasaportën e Republikës së Kosovës, që nënkupton se qytetarët pas liberalizimit të vizave gëzojnë të drejtën për ta vizituar këtë shtet.
Megjithatë, sipas një dokumenti të Bashkimit Evropian, Spanja nuk e ka ndryshuar qëndrimin për ta njohur pavarësinë e Kosovës.
“Spanja njeh, nga 1 janari 2024, pasaportat të lëshuara nga Kosova. Ky ndryshim nuk përbën në asnjë mënyrë njohje zyrtare të Kosovës si shtet i pavarur”, thuhet në dokument.
E zëvendëskryeministri, Besnik Bislimi ka thënë se tashmë qytetarët e Kosovës do të mund të udhëtojnë pa viza edhe në Spanjë.
Ai iu referua Drejtorisë së Përgjithshme për Migracionin dhe Çështjet e Brendshme të Bashkimi Europian (DG Home) se ka njoftuar për këtë.
“Lajmet e mira vazhdojnë. Për qytetarët tanë dhe shtetin. DG Home ka njoftuar se tashmë edhe Spanja i njeh pasaportat e Republikës së Kosovës. Pra mund të udhëtojmë pa viza dhe drejt këtij shteti. Ndërsa me 1 janar nisi lëvizja pa viza, Spanja është destinacion që i shtohet vendeve të zonës Shengen ku mund të udhëtojmë përmes liberalizimit, e ku pengesë më herët ishte mosnjohja e pasaportës sonë. Vazhdojmë tutje, për të sjellë lajme të tjera të mira, e që ndikojnë pozitivisht për qytetarët tanë”, ka shkruar Bislimi në Facebook.
Ndërsa, ministrja e Punëve të Jashtme, Donika Gërvalla ka thënë se bazuar në njoftimin e shteteve anëtare të BE-së, Spanja njeh pasaportën e zakonshme të Kosovës nga 1 janari 2024.
“Qytetarët e Kosovës tani mund të udhëtojnë në Spanjë. Bazuar në njoftimet e shteteve anëtare të BE-së deri më 5 janar 2024, Mbretëria e Spanjës njeh pasaportat e zakonshme të Republikës së Kosovës që nga 1 janari 2024”, ka shkruar ajo në “X” derisa edhe e ka falënderuar Spanjën./teve1.info