Një sasi municioni të kontrabanduar të kalibrave të ndryshëm, përfshirë municion për armë të gjata dhe për armë gjahu, është sekuestruar të enjten nga Dogana e Kosovës.
Sipas njoftimit zyrtar, municioni është gjetur në një subjekt afarist në Prishtinë, gjatë një kontrolli të befasishëm të realizuar nga njësitet e Doganës.
“Sot, më datë 09.10.2025, në regjionin e Prishtinës, njësitet e Doganës së Kosovës, në bashkëpunim me sektorët kompetentë dhe në bazë të mandatit nga Kodi Doganor dhe i Akcizave të Republikës së Kosovës, kanë kryer një kontroll të befasishëm në një subjekt afarist. Gjatë kontrollit të objekteve ndërlidhëse të biznesit, është zbuluar dhe sekuestruar një sasi municioni të kontrabanduar të kalibrave të ndryshëm, përfshirë municion për armë të gjata dhe për armë gjahu, i cili ishte mbajtur në kundërshtim me dispozitat ligjore në fuqi”, thuhet në njoftim.
Dogana ka bërë të ditur se rasti është dokumentuar dhe është njoftuar Prokuroria kompetente, ndërsa hetimet do të vazhdojnë në bashkëpunim me agjencitë tjera të zbatimit të ligjit, me qëllim të identifikimit të burimit dhe destinacionit të këtij municioni të kontrabanduar.
“Dogana e Kosovës mbetet e përkushtuar në luftimin e kontrabandës dhe çdo veprimtarie të paligjshme, me qëllim të mbrojtjes së sigurisë publike dhe interesave të Republikës së Kosovës”, përfundon njoftimi./teve1.info/
