Zyrtarët doganorë në Zyrën Doganore të Prishtinës kanë zbuluar një dërgesë me mallra të padeklaruara gjatë një kontrolli të detajuar.
Sipas njoftimit të Doganës, bëhet fjalë për preparate për trajtimin e flokëve pas implantit, me vlerë rreth 13 mijë euro, të cilat nuk ishin përfshirë në dokumentacionin përkatës doganor.
“Gjatë kontrollit të detajuar të një dërgese, janë zbuluar mallra të padeklaruara, konkretisht preparate për trajtimin e flokëve pas implantit, të cilat nuk ishin të përfshira në dokumentacionin përkatës doganor”, thuhet në njoftimin e Doganës.
Pas verifikimeve të kryera nga autoritetet, mallrat janë ndaluar dhe konfiskuar në përputhje me procedurat ligjore në fuqi.
“Rasti është trajtuar sipas dispozitave të legjislacionit doganor, me qëllim të parandalimit të shmangies nga detyrimet doganore”, thuhet tutje në njoftim.
