Dogana e Kosovës ka ndaluar mbi 3,400 aksesorë telefonikë të dyshuar si produkte që shkelin markat tregtare të mbrojtura.
Në Terminalin Doganor Vërmicë, për zhdoganim është paraqitur një dërgesa me origjinë nga Kina.
Pas rivlerësimit të dërgesës dhe kontrollit fizik të realizuar nga zyrtarët e doganës, gjatë ekzaminimit janë identifikuar mallra për të cilat ekziston dyshimi se cenojnë të drejtat e pronësisë intelektuale.
“Në total janë ndaluar 3,480 copë koka mbushës për telefona mobil me brendin Apple, për të cilat dyshohet se shkelin markën tregtare të mbrojtur të kompanisë Apple. Në përputhje me procedurat ligjore për mbrojtjen e të drejtave të pronësisë intelektuale, Dogana e Kosovës ka ndërmarrë masat e nevojshme për ndalimin e mallrave dhe njoftimin e palëve relevante për verifikimin e autenticitetit të produkteve.Dogana e Kosovës mbetet e përkushtuar në luftimin e tregtisë së mallrave të falsifikuara dhe në mbrojtjen e konsumatorëve, bizneseve legjitime dhe të drejtave të pronarëve të markave tregtare”, thuhet në njoftim./teve1.info/
