Dogana e Kosovës ka parandaluar një rast të kontrabandimit të produkteve të mishit në Pikëkalimin Kufitar në Glloboçicë, duke sekuestruar rreth 200 kilogramë mish të dyshimtë për transport jo adekuat dhe pa kushte higjienike.
Sipas njoftimit zyrtar, rasti është zbuluar gjatë kontrolleve rutinë mbrëmë rreth orës 18:20, kur zyrtarët doganorë kanë ndaluar një automjet udhëtarësh që po hynte në territorin e Kosovës. Edhe pse drejtuesi i automjetit kishte deklaruar se nuk posedonte mall për kontroll, gjatë kontrollit të detajuar janë gjetur 10 copë rollne dyneri, me peshë rreth 20 kg secila, në total rreth 200 kg mish.
Vlera e mallit vlerësohet rreth 800 euro, ndërsa sipas autoriteteve, transporti i tij është bërë pa kushte frigoriferike dhe pa kontroll sanitar, duke paraqitur rrezik potencial për sigurinë ushqimore.
Malli është sekuestruar dhe do t’i nënshtrohet procedurave të mëtejshme ligjore, ndërsa ndaj palës së përfshirë është iniciuar procedurë kundërvajtëse.
Dogana e Kosovës u ka bërë thirrje qytetarëve dhe bizneseve që të shmangin kontrabandën dhe aktivitetet joformale, duke theksuar rrezikun serioz për shëndetin publik dhe pasojat ligjore që sjellin shkeljet e tilla./teve1.info/
