Dogana e Kosovës ka ndaluar një dylbi të destinuar për përdorim me pushkë snajper, gjatë kontrollit të një automjeti në pikën kufitare Kullë.
Sipas Doganës, automjeti me targa të huaja drejtohej nga një shtetas i Republikës së Kosovës.
Gjatë intervistimit, udhëtari nuk kishte deklaruar mallra që duhej të deklaroheshin.
“Gjatë intervistimit, udhëtari është pyetur nëse kishte mallra apo mjete që duhej të deklaroheshin. Ai nuk ka deklaruar ndonjë mall. Megjithatë, bazuar në dyshimet e krijuara gjatë kontrollit, zyrtarët doganorë kanë kryer kontroll të detajuar të automjetit.Gjatë kontrollit është gjetur një dylbi e destinuar për përdorim me pushkë snajper, për të cilën nuk janë paraqitur dokumentet apo autorizimet përkatëse. Pas dyshimeve të krijuara gjatë kontrollit, zyrtarët doganorë kryen një kontroll të detajuar të automjetit, ku gjetën dylbinë për të cilën nuk u paraqitën dokumentet apo autorizimet përkatëse”, thuhet në njoftim.
Malli është ndaluar nga Dogana, ndërsa ndaj personit janë ndërmarrë masat përkatëse dhe është iniciuar procedurë kundërvajtëse dhe procedura të tjera administrative, në përputhje me legjislacionin në fuqi.
“Sipas Kodit Nr. 08/L-247 Doganor dhe të Akcizave, mallrat që hyjnë në territorin doganor të Republikës së Kosovës i nënshtrohen mbikëqyrjes dhe kontrolleve doganore dhe, kur është e zbatueshme, edhe ndalesave dhe kufizimeve që lidhen, ndër të tjera, me sigurinë publike.
Dogana e Kosovës mbetet e përkushtuar në kontrollin e kufijve dhe në parandalimin e hyrjes së mallrave të rrezikshme, të kufizuara apo të palejuara, duke garantuar zbatimin e legjislacionit dhe mbrojtjen e sigurisë së qytetarëve”, theksohet në fund të njoftimit./teve1.info/
