Dogana e Kosovës së bashku me Policinë e Kosovës pas një pune disa javore të përkushtuar në informacione operative – inteligjente ka arritur të identifikojë dy lokacione në Ferizaj, të cilat shërbenin si pika grumbulluese të mallrave të kontrabanduara.
Gjatë kontrolleve, policia në lokacionin e parë ka sekuestruar 100 kg duhan të papërpunuar dhe 109 kg duhan të përpunuar, kurse në lokacionin e dytë ka sekuestruar 100 kg duhan të papërpunuar.
Sipas Doganës, vlera e mallrave të sekuestruar arrin shumën prej 4,500 euro.
“Ferizaj, 27 shtator 2025 – Task Forca në kuadër të Drejtorisë Rajonale Kufitare Lindje, e përbërë nga Policia e Kosovës dhe Dogana e Kosovës, pas një pune disa javore të përkushtuar dhe duke u bazuar në informacione operative–inteligjente, ka arritur të identifikojë dy lokacione të cilat shërbenin si pika grumbulluese të mallrave të kontrabanduara. Gjatë kontrolleve të realizuara në këto lokacione, me urdhër të Prokurorit të Shtetit në Ferizaj, janë sekuestruar mallra si në vijim: në lokacionin e parë janë gjetur 100 kg duhan i papërpunuar dhe 109 kg duhan i përpunuar, ndërsa në lokacionin e dytë janë gjetur 100 kg duhan i papërpunuar. Malli i sekuestruar është dorëzuar tek Dogana e Kosovës për procedurat e mëtejme ligjore. Sipas vlerësimeve të para, të bazuara në çmimet e tregut, vlera e përgjithshme e mallrave të sekuestruara arrin shumën prej rreth 4,500 euro, ndërsa shmangiet nga detyrimet doganore dhe akciza llogariten të jenë rreth 15,000 euro”, thuhet në njoftimin e Doganës./teve1.info/
