Njësitet Antikontrabandë të Doganës së Kosovës kanë zbuluar dhe ndaluar një sasi prej 720 palësh patika gjatë një kontrolli të detajuar të një ngarkese komerciale. Sipas autoriteteve, mallrat e sekuestruara dyshohet se shkelin të drejtën e pronësisë intelektuale.
“Pas verifikimit të kryer nga oficerët doganorë, është konstatuar se mallrat e ndaluara përfaqësojnë imitim të markave të mbrojtura ndërkombëtarisht, duke përbërë shkelje të legjislacionit në fuqi që rregullon të drejtën e pronësisë intelektuale”, thuhet në njoftimin e Doganës së Kosovës.
Institucioni theksoi përkushtimin e tij për të parandaluar hyrjen e produkteve të falsifikuara në tregun e brendshëm.
“Dogana e Kosovës mbetet e përkushtuar në zbatimin e ligjit dhe në mbrojtjen e tregut të brendshëm nga hyrja e produkteve të falsifikuara, të cilat dëmtojnë konsumatorin, bizneset e ndershme dhe ekonominë e vendit”, vijon njoftimi.
Rasti është duke u trajtuar konform procedurave ligjore në fuqi.
