Dogana e Kosovës ka realizuar disa operacione kontrolli gjatë kësaj jave në zbulimin e aktiviteteve të ndryshme të paligjshme në disa lokacione të ndryshme të vendit.
Në Fushë-Kosovë, gjatë një kontrolli, është zbuluar një hapësirë për prodhimin dhe falsifikimin e mallrave pa prejardhje të qartë, ku janë sekuestruar:
- 9,560 copë maica për të rritur me marka të ndryshme;
- 4,300 copë etiketa letre me mbishkrimin e firmave të njohura;
- Disa makina qepje.
Lidhur me këtë rast, është njoftuar Prokuroria, ku pas intervistimit të palës së përfshirë, janë ngritur kallëzime penale për “Tregti të ndaluar”, “Prodhim të paautorizuar”, si dhe “Mashtrim të konsumatorëve”.
Ndërkohë, në Mitrovicë, njësitet e Doganës së Kosovës kanë kryer një kontroll në një subjekt që merrej me shitjen e automjeteve të përdorura.
Gjatë kontroles, janë identifikuar 37 automjete të ndryshme të pazhdoganuara, të cilat subjekti kishte për qëllim t’i përdorte për pjesë këmbimi.
“Automjetet janë dërguar për verifikim për të parë nëse janë të kërkuara, dhe pas përfundimit të kësaj procedure, rasti do të trajtohet më tej në koordinim me Prokurorinë”, thuhet në njoftim.
Ndërkaq, në Gjilan është zbuluar dhe sekuestruar mall pa dokumentacion, i cili dyshohet se është kontrabanduar në Kosovë. Malli i sekuestruar përfshin:
- 10 copë helmeta të ndryshme për motoçikleta – të reja;
- 16 copë goma të ndryshme për motoçikleta – të reja;
- 3 copë maska ballore për motoçikleta Yamaha Nmax – të përdorura;
Ndaj palës janë iniciuar procedurat kundërvajtëse./teve1.info/
