Dogana e Kosovës ka mbikëqyrur asgjësimin e mbi 6 mijë maicave, pasi është konstatuar se ato cenonin të drejtat e pronësisë intelektuale.
Sipas njoftimit të Doganës, rasti kishte nisur më 2 qershor 2026, kur në Terminalin Doganor në Mitrovicë një importues kishte paraqitur një para-deklarim për zhdoganim, pa specifikuar markën tregtare të produkteve.
Pas analizës së riskut, dërgesa ishte përzgjedhur për kontroll fizik dhe dokumentar nga zyrtarët doganorë.
“Gjatë kontrollit janë identifikuar elemente që ngritën dyshime për shkelje të të drejtave të pronësisë intelektuale”, thuhet në njoftimin e Doganës së Kosovës.
Sipas Doganës, pas verifikimeve, Sektori për Mbrojtjen e të Drejtave të Pronësisë Intelektuale ka kontaktuar bartësin e së drejtës, i cili ka konfirmuar se produktet përbënin shkelje të të drejtave të mbrojtura.
Si rezultat, Dogana ka ndërmarrë masat ligjore, duke ndaluar lirimin e mallit, duke iniciuar procedurë kundërvajtëse ndaj importuesit dhe duke nisur procedurën për asgjësimin e produkteve.
Mallrat janë asgjësuar më 8 korrik 2026 nën mbikëqyrjen e Doganës së Kosovës, me qëllim që të mos qarkullojnë në tregun e Kosovës.
“Veprimet janë ndërmarrë në zbatim të Ligjit për Masat Doganore për Mbrojtjen e të Drejtave të Pronësisë Intelektuale, si dhe dispozitave përkatëse të Kodit Doganor dhe të Akcizave të Kosovës”, thuhet në njoftim.
Dogana e Kosovës ka bërë të ditur se do të vazhdojë kontrollet për parandalimin e tregtisë së mallrave të falsifikuara, me synim mbrojtjen e konsumatorëve, bizneseve legjitime dhe garantimin e konkurrencës së ndershme në treg.
