Është vendi në të cilin ruhet historia e heroit të kombit, Zahir Pajaziti.
Vizitorë të shumtë vijnë çdo vit në këtë vend të Orllan të Podujevës.
Por muaj më parë dikush duket se hyri brenda me një qëllim tjetër.
Kjo pasi objekti i cili gjendet prapa kullës së Zahir Pajazitit pësoi disa dëmtime në tavan dhe në korridore.
Sipas një njoftimi të lëshuar nga policia, rasti dyshohet të ketë ndodhur mes 30 majit dhe 30 qershorit.
Megjithatë, për dëmtimet në kompleks, ata u njoftuan tek të hënën më 6 qershor, nga drejtori i Agjencisë për Menaxhimin e Monumenteve dhe Komplekseve Memoriale (AMMKM), Imer Hakaj.
Këtë e konfirmoi vetë Hakaj në një përgjigje me shkrim për televizionin.
“Ju njoftoj se, pas pranimit të raportit lidhur me dëmtimet në Kompleksin Memorial “Kulla e Zahir Pajazitit” në Orllan, në cilësinë e Drejtorit Ekzekutiv, më datë 06.07.2026, kam paraqitur kërkesë për inicimin e hetimeve në Policinë e Kosovës, përkatësisht në Drejtorinë Rajonale të Policisë në Prishtinë dhe Stacionin Policor në Podujevë”, u shpreh Imer Hakaj drejtor i AMMKM-së
Prandaj, edhe prokuroria është angazhuar tashmë në hetimin e dëmtimeve të shkaktuara në kompleks.
E për t’i parë dëmtimet nga afër, në Orllan të Podujevës erdhi sot edhe bashkëluftëtari i Zahir Pajzitit, Avni Ajeti, i cili e viziton rregullisht kompleksin.
“Me bo me qëllu , se ndonjëherë mundem me dal edhe na për vizitë e më qëllu në ata njerëz ata duhet më ditë që ballafaqohen keq me neve me secilin ushtar të Ushtrisë Çlirimtare të Kosovës sepse nuk lejojmë më u prek memorialet dhe figurat e heronjve të popullit. Kjo jo si një mesazh kërcënues por na ka prekur thellë në shpirt”, u shpreh ai.
Ajeti pret që të merren me shumë masa sigurie që të mos ndodhin raste të tilla.
“Normalisht masa më shumë por edhe mirëmbajtje më të mirë sepse qytetarët vec po shihet se e vizitojnë, unë nuk e di a marrin mjete për mirëmbajtje apo jo. Por ëktu ish dashtë më u mirëmbajt më mirë dhe siguria më qenë më në nivel”, tha bashkëlufetari i Zahir Pajazitit.
Edhe vizitorë të tjerë, i konsiderojnë të dhimbshme dëmtimet që iu shkaktuan kompleksit.
Për rastin ka reaguar edhe ministri në detyrë i Punës, Familjes dhe Vlerave të Luftës Clirimtare, Andin Hoti, i cili ka thënë që dëmtimi i komplekseve memoriale të dëshmorëve dhe heronjve të Kosovës nuk është thjesht vandalizëm, por është sulm ndaj kujtesës sonë kolektive.
