Demokracia në Veprim, me nisjen zyrtare të fushatës për zgjedhjet parlamentare të 7 qershorit 2026, ka prezantuar planin për vëzhgimin e procesit zgjedhor dhe u ka bërë thirrje subjekteve politike që të respektojnë standardet e garës dhe të fokusohen në debat programor.
DnV vlerëson se aktivitetet e parafushatës dhe komunikimi elektoral kanë nisur më herët, ndërsa shpreh shqetësim për vendime qeveritare që, sipas tyre, kanë ndikuar në barazinë e garës, përmes shpërndarjes së pakove financiare.
Gjatë 10 ditëve të fushatës, DnV do të monitorojë shpenzimet e subjekteve në rrjetet sociale, përmbajtjen e sponsorizuar, si dhe gjuhën e urrejtjes, dezinformimin dhe lajmet e rreme në media online.
Po ashtu, do të vëzhgohen edhe mediat tradicionale për të vlerësuar nëse respektohet balanca në mbulimin e subjekteve politike dhe kandidatëve.
Në ditën e zgjedhjeve, DnV do të angazhojë rreth 500 vëzhgues në vendvotime, ndërsa pas procesit do të monitorojë edhe numërimin e votave në nivel komunal dhe qendror.
