Demokracia në Veprim e cila po vëzhgon procesin e votimit përmes ekipeve mobile për ose kundër largimit të kryetarëve në katër komunat veriore të Kosovës ka bërë të ditur se të gjitha qendrat e votimit janë hapur me kohë.
DnV në një njoftim në Facebook thotë se Policia e Kosovës është prezentë dhe po garanton sigurinë e vendit.
DnV ka bërë të ditur se nuk vërehet interes nga qytetarët e komunave të Mitrovicës së Veriut, Leposaviq, Zveçan dhe Zubin Potok për pjesëmarrje në votim.
“Procesi i votimit, deri në orën 09:00 është i qetë dhe nuk është vërehet interes nga qytetarët për pjesëmarrje në proces të votimit. Sa i përket administrimit të procesit, KQZ është vonuar me informim për qytetarët lidhur me vendndodhjen e qendrave të votimit, meqë ky vendim është marrë vetëm një ditë para procesit të votimit. Gjatë vizitave të vëzhguesve nëpër Qendra të Votimit është vërejtur se disa prej tyre nuk mundësojnë qasje për persona me aftësi të kufizuar dhe për persona që janë në moshë të shtyer. Votimi brenda disa Qendrave të Votimit është aranzhuar për disa vendvotime në një hapësirë të përbashkët sipas modelit të hapur”, thuhet në njoftim.
Ndryshe, sipas DnV-së në të gjitha vendvotimet janë të vendosura kamerat e sigurisë, ku sipas saj, është hera e parë në Kosovë që qytetarët votojnë nën survejimin e kamerave.
“Po ashtu është vërejtur se në të gjitha vendvotimet ka të vendosura kamera të sigurisë, ndërkohë që kabinat e votimit janë të vendosura në pozicionin që mund t’a cenojnë fshehtësinë e votës dhe mund të shihen si intimidim nga votuesit. instruksionet për vendosjen kabinave të votimit në këtë mënyrë janë përfshirë në udhëzuesit që KQZ ka përgatitur. Kjo është hera e parë që qytetarët do të votojnë nën survejimin e kamerave”,thuhet në njoftim./teve1.info/
