Koalicioni i OJQ-ve, Demokracia në Veprim ka kërkuar rinumërim të plotë të votave.
Sipas tyre procesi i rinumërimit të pjesshëm ka treguar devijime të konsiderueshme dhe mos numërimi i plotë po zbeh besimin në në integritetin e procesit zgjedhor.
“DnV vlerëson se gjetjet e deritanishme krijojnë bazë të mjaftueshme që organet e drejtësisë ta trajtojnë këtë çështje me prioritet dhe me një qasje të koordinuar dhe hetim gjithëpërfshirës në nivel vendi. Një qasje e tillë do të mundëson sqarimin e përgjegjësive individuale, por edhe identifikimin e çdo modeli të mundshëm të veprimeve të koordinuara që mund të kenë cenuar integritetin e numërimit”, thuhet nga DnV.
Ata kanë kërkuar hetim përtej nivelit teknik, ku sipas komunikatës thuhet se duhet të hetohen edhe kandidatët.
“Në mënyrë të veçantë, DnV vlerëson se hetimi duhet të shtrihet përtej nivelit teknik të procesit të numërimit. Modelet e përsëritura të devijimeve në favor të kandidatëve të caktuar brenda dhe nëpër komuna të caktuara, krijojnë bazë të arsyeshme për dyshimin se këto nuk janë produkte të gabimeve njerëzore apo të rastësisë, por të veprimeve të qëllimshme të komisionerëve. Për rrjedhojë, edhe kandidatët që rezultojnë përfitues nga këto mospërputhje dhe manipulime duhet të jenë pjesë e hetimeve, në mënyrë që të sqarohet nëse ka pasur nxitje, koordinim apo përfshirje direkte apo indirekte në manipulimin e votës”, thuhet në komunikatën e DnV-së.
