Sot qytetarët e Kosovës po ushtrojnë të drejtën e tyre kushtetuese për të zgjedhur përfaqësuesit në Kuvendin e Kosovës, ndërsa organizata “Demokracia në Veprim” (DnV) po monitoron nga afër të gjithë procesin zgjedhor në vend.
DnV thekson se integriteti i zgjedhjeve varet nga respektimi i standardeve demokratike, administrimi profesional i procesit dhe garantimi i të drejtës së secilit qytetar për të votuar lirshëm dhe pa pengesa.
Për këtë qëllim, rrjeti i saj prej 500 vëzhguesish është i angazhuar në 500 vendvotime në mbarë Kosovën, të përzgjedhura sipas një mostre përfaqësuese. Ata po monitorojnë procesin nga hapja e vendvotimeve deri në përfundimin e numërimit të votave, duke raportuar për mbarëvajtjen e procesit zgjedhor në kohë reale.
DnV bëri të ditur se vëzhguesit po përcjellin respektimin e procedurave të votimit dhe numërimit, fshehtësinë e votës dhe qasjen e barabartë për të gjithë qytetarët, në përputhje me standardet ndërkombëtare të vëzhgimit të pavarur. Organizata thekson gjithashtu se në këto zgjedhje nuk ka misione ndërkombëtare vëzhguese.
Sipas të dhënave të saj, në Kosovë kanë të drejtë vote 1,959,962 qytetarë, ndërsa lista e votuesve është më e vogël krahasuar me zgjedhjet e mbajtura më 28 dhjetor 2025.
DnV ka inkurajuar të gjithë qytetarët me të drejtë vote që të marrin pjesë në zgjedhje dhe të votojnë sipas bindjeve të tyre, duke kontribuar në një proces demokratik dhe të rregullt. Një thirrje e veçantë u është drejtuar edhe mbi 16 mijë votuesve që votojnë për herë të parë.
Sa i përket ecurisë së procesit, DnV raporton se shumica e vendvotimeve janë hapur me kohë, ndërsa vonesa janë shënuar në një përqindje të vogël për shkak të mungesës së komisionerëve dhe kabinave të votimit.
Po ashtu, sipas vëzhgimeve të tyre, në disa qendra janë evidentuar probleme me kamerat e vendvotimit, mungesë e grave komisionere, si dhe raste të mungesës së infrastrukturës për personat me aftësi të kufizuara, duke kufizuar qasjen e plotë në procesin zgjedhor.
DnV gjithashtu ka vërejtur raste të materialeve promovuese pranë qendrave të votimit, pavarësisht rregullave që ndalojnë vendosjen e tyre në afërsi të vendvotimeve. Në disa raste është raportuar edhe mungesë e zyrtarëve policorë në përputhje me parashikimet ligjore.
Sa i përket informimit të votuesve, DnV thekson se ende ekzistojnë mangësi në disa qendra, përfshirë mungesën e tavolinave ndihmëse dhe posterëve informues për mënyrën e votimit, ndonëse situata paraqitet më e përmirësuar krahasuar me zgjedhjet e kaluara.
