Veturën e djegur po e largojnë nga vendi i ngjarjes.
Njësoj si kjo kishin përfunduar edhe shtatë automjete tjera të hënën pasdite në lagjen Veternik të Prishtinës, në parkingun e qendrës tregtare “Albi Mall”.
Dyshimet janë se zjarri kaploi një veturë, pas së cilës u dogjën edhe disa vetura tjera përreth, rreth tetë të tilla.
E me të kuptuar lajmin, njësitet policore kanë dalë në vendin e ngjarjes.
“Rreth orës 13:40 në Veternik të Prishtinës, në një parking veturash është raportuar për një rast zjarri. Njësitet policore menjëherë kanë dalë në vendin e ngjarjes, ku kanë vërejtur se nga zjarri, i cili dyshohet se ka kapluar një veturë të parkuar, dyshohet se janë djegur/dëmtuar edhe disa të tjera të parkuara. Janë njoftuar me kohë njësitet e zjarrfikësve, të cilët lokalizuan zjarrin. Për momentin nuk raportohet për të lënduar, por vetëm për dëme materiale në 7 apo 8 vetura. Lidhur me rastin janë duke u kryer hetime intensive”, thuhet në njoftimin e Policisë.
Asnjë person nuk është lënduar si pasojë e zjarrit të madh që kaploi parkingun e qendrës tregtare.
Raporti i gazetarit Shpat Blakçori.
