“Gjyshi priste çdo minutë që babi të hapte derën e spitalit, tha Endriti, djali i ish-presidentit Hashim Thaçi, gjatë fjalimit në mbledhjen komemorative për gjyshin e tij, Haxhi Thaçi.
Ai ka ndarë kujtime nga ditët e fundit të gjyshit të tij, ku ndër të tjera tha se tri orët që Haxhi Thaci i kaloi me të birin të enjten në QKUK, ishin më të rëndësishmet e jetës së tij.
“Gjyshi asnjëherë nuk është dorëzuar përballë sëmundjeve, shpresa për të ritakuar babin, dhe bashëkëluftarët e tij në Hagë ishte më e madhe sesa dhimbja e sëmundjeve. Besimi në pafajësinë e tyre ishte më i hekurt sesa aktakuza e padrejtë. Në muajt e fundit, çdo orë e minutë priste që babi të hapte derën e spitalit. Nuk u dorëzua dhe u rikthye në jetë disa herë. Tre orë bashkëbisedim atë ditë, u bënë tri orët me të rëndësishme të jetës së tij. Një bisedë, babë e bir. Që të dy e kërkonin lirinë, çlirimin. Vdekjen e shpejtë të gjyshit e pash në fytyrën e babit kur doli nga spitali. Gjyshi i mbijetoi të gjithë vuajtjeve e dhimbjeve nëpër të cilat kaluam si popull, por këto katër vite nuk i mbijetoi vuajtjeve dhe dhimbjes nga padrejtësia”, tha Endrit Thaçi.
Ai tha se Haxhi Thaçi ishte “kështjellë e pathyeshme e urtësisë dhe dashurisë”.
Gjatë fjalimit të tij, Endriti përmendi mungesën e ish-presidentit Thaçi i cili ndodhet në Hagë duke u përballur me një proces të tejzgjatur gjyqësor për krime të pretenduara të luftës.
Një sëmundje e pashërueshme për njerëz të fortë, krenar dhe me dinjitet. Siç thoshte shpesh gjyshi, me vdekë pa u korit. Gjysh as sot nuk jemi korit, fatkeqësisht babin nuk e lejuan të japë lamtumiren e fundit bashkë me ne sot, nuk e lejuan të ja gjuajnë një grusht të dheut të Drenicës mbi varrë, por në vend të babit, sot ka ardhur Kosova, Shqipëria, Maqedonia e Lugina. I madh dhe i përjetshëm do të jetë kujtimi ynë për ty gjysh. Për ne gjyshi ishte kështjellë e pathyeshme e urtësisë dhe dashurisë. Na mësoi se bashkimi është çelësi i çdo fitoreje dhe personifikimi i këtij bashkimi janë rërët e UCK-së në Hagë. Le të ndjekim shembullin e tyre për të bashkuar sërish për fitoren e radhës mbi padrejtësinë”, tha Thaçi.
Varrimi i Haxhi Thaçit pritet të bëhet sot në ora 15:00 në varrezat e fshatit Burojë të Skenderaj.
Haxhi Thaçi vdiq të dielën vonë pasi u përballë me probleme shëndetësore, për çka qëndroi një kohë i shtrirë në Qendrën Klinike Universitare të Kosovës.
Hashim Thaçi vizitoi të enjten babain e vet në QKUK, me një leje nga Gjykata Speciale, e cila po gjykon për krime të pretenduara të luftës, transmeton KP.
Pas vizitës rreth tre orësh nën masa të rrepta të sigurisë, Thaçi u rikthye sërish në Hagë – qytetin holandez ku e ka selinë kjo gjykatë.
