Altin Krasniqi, djali i ish-kryetarit të Kuvendit, Jakup Krasniqi ka reaguar pas miratimit në Kuvend të deklaratës lidhur me aktgjykimin e Dhomave të Specializuara në Hagë ndaj katër ish-krerëve të Ushtrisë Çlirimtare të Kosovës (UÇK).
Krasniqi e ka cilësuar deklaratën e miratuar si një nismë të mirë, por ka theksuar se, sipas tij, pa miratimin e ligjit për Gjykatën Speciale nuk është ndërmarrë ndonjë veprim konkret.
Ai ka shtuar se mbrojtja e UÇK-së duhet të bëhet përmes veprimeve konkrete dhe vendimeve që mbrojnë luftën dhe vlerat e saj.
“Deklarata e votuar sot në Kuvend është një nismë e mirë, por pa u votuar ligji për Gjykatën Speciale, nuk është bërë asgjë konkrete. UÇK-ja mbrohet me veprime konkrete dhe me vendime që e mbrojnë luftën e saj të drejtë dhe vlerat e saj. Qytetarët e Kosovës e dinë dhe e kanë ditur gjithmonë se UÇK-ja ka bërë një luftë të drejtë për lirinë e Kosovës”, ka shkruar Krasniqi në Facebook.
Ndryshe, Kuvendi i Kosovës me 99 vota për, asnjë kundër dhe asnjë abstenim, e ka miratuar Deklaratën për aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Mes tjerash, në këtë deklaratë shprehet shqetësimi për aktgjykimin e shkallës së parë kundër katërshes së Ushtrisë Çlirimtare të Kosovës dhe kërkohet nga të gjitha institucionet shtetërore të Kosovës që të ndërmerren të gjitha veprimet e nevojshme për mbrojtjen e së vërtetës dhe pastërtisë së luftës çlirimtare të popullit të Kosovës.
