Demokracia në Veprim ka njoftuar se sot shënohet Dita Globale e Zgjedhjeve.
Sipas DnV-së, kjo ditë rikujton se votimi është një nga të drejtat më themelore qytetare dhe mënyra kryesore përmes së cilës qytetarët manifestojnë vullnetin e tyre në mënyrë demokratike.
DnV thekson se kjo e drejtë ka kuptim vetëm kur procesi zgjedhor është i besueshëm dhe rezultati i tij pranohet si i tillë.
Kjo organizatë ka bërë të ditur se procesi i fundit zgjedhor në Kosovë nuk është mbyllur plotësisht, për shkak dyshimeve për manipulime në disa komuna të vendit.
“Në Kosovë, procesi i fundit zgjedhor ende nuk është mbyllur plotësisht. Dyshimet për manipulime dhe zvarritjet në përfundimin e procedurave paszgjedhore nuk janë thjesht çështje teknike. Ato ndikojnë drejtpërdrejt në besimin e publikut dhe në mënyrën se si qytetarët e shohin vlerën e votës së tyre.Zgjedhjet nuk janë vetëm dita e votimit, por një proces i tërësishëm që kërkon standarde të qarta dhe zbatim të barabartë në çdo fazë të tij.Andaj, Demokracia në Veprim (#DnV) do të vazhdojë të monitorojë dhe të kërkojë transparencë e llogaridhënie deri në përmbylljen e plotë të procesit. Integriteti zgjedhor është kushti minimal për një demokraci dhe institucione që funksionojnë”, thuhet në njoftim./teve1.info/
