Ditën e nisi në Prekaz.
Presidentja e re e Republikës, Justina Shiroka Pula, te enjten bëri homazhe në kompleksin memorial “Adem Jashari” në Prekaz.
Nga aty, ajo bëri homazhe edhe te varri i ish presidentit, Ibrahim Rugova dhe veprimtarit, Adem Demaci.
E me marrjen e detyrës, zhvilloi edhe takime.
Në takim të parë e priti kryeministrin e Kosovës, Albin Kurti.
Nga zyra e Presidencës nuk dhanë shumë detaje rreth këtij takimi.
“Gjatë takimit, Presidentja Shiroka Pula shprehu gatishmërinë për bashkëpunim të ngushtë dhe bashkërendim ndërmjet institucioneve, në shërbim të qytetarëve dhe të interesave të vendit”, thuhet nga Presidenca.
Çka diskutuan, para gazetarëve tregoi edhe kryeministri, Albin Kurti.
“Është një takim i parë me presidenten e re të Republikës, mikpritje e përzemërt dhe zotim i përbashkët për punë të mëdha të përditshme, për interesin shtetëror e publik, për të mirën e qytetarëve pa dallim. Unë e falënderova shumë presidenten, e cila na ka nderuar me pranimin e saj për kandidaturën të martën dhe tash na presin shumë punë dhe angazhime, të cilat natyrisht që me vullnet të mirë dhe me gjithë dijen e mundësinë që kemi do t’i shpijmë përpara sa më shpejt që mundemi”, u shpreh Kurti.
Por Kurti nuk tregoi nëse presidentja pati ndonjë kërkesë.
Bashkëpunim nga presidentja kanë kërkuar edhe Lidhja Demokratike e Kosovës e Aleanca.
“Me këtë rast unë dëshiroj me përgëzu edhe me u uru Justina Shiroka Pulen. Zgjedhja e saj për presidente është shpresë. Përballim i një situate dhe krize politike për dy vjet gati që Kosovën e çojnë në vitet e humbura. Ajo tani bart këtë shpresë të pjesës dërmuese të Kosovës, që Kosova ka potencial, ka mundësi me përballuar proceset politike dhe që jo vetëm opozita, po edhe shoqëria civile edhe të tjerët e kanë një derë ku mund të komunikojnë dhe uroj të mos jetë një shpirt ku mund të vajtojnë”, tha Lutfi Haziri nënkryetar i LDK-sw
Shpresë në Shiroka Pulën kanë edhe kryetarët e komunave.
Njëri nga ta edhe ai i kryeqytetit, Përparim Rama.
“Unë i kam uruar presidentes së re, i uroj të gjithëve, qeverisë, opozitës, që në fund kanë mundur me u marrë vesh për një person si Justina Shiroka-Pula, një mikeshë faktikisht, një person i mrekullueshëm, një person me një eksperiencë gjatë akademike, shkencore, politike, e që mendon faktikisht përtej partive politike. Pra është një person që gjithsesi besoj që bashkon komunitetin, bashkon shoqërinë tonë dhe i uroj çdo të mirë në këtë mision të madh faktikisht që tash e ka në dorë për me i shty përpara proceset e mëdha për vendin tonë”, u shpreh Rama.
Shiroka Pula u zgjodh presidente me 81 vota.
