Fillon të bien vlerat e manganit në ujë, KRU “Prishtina” thonë se gjendja s’është alarmante
Që katër ditë banorët e Prishtinës e një pjesë e Graçanicës nuk mund të pijën ujë që buron nga Liqeni i Badovcit. Por nga Instituti Kombëtar i Shëndetësisë Publike, kanë njoftuar se vlerat e manganit kanë filluar të bijën në këtë burim. Derisa qytetarët po furnizohen përmes autoboteve te vendosur nga KRU “Prishtina”.
Kjo është dita e katërt që Driton Rashiti del për të mbushur shishet me ujë.
Banori i lagjes Hajvalia në kryeqyteti, në këtë autobot furnizohet për ujë për pije e ushqim.
Kjo pasi uji që vjen nga liqeni akumulues i Badovcit është bërë i papijshëm pas rritjes së sasisë së një elementi kimik të quajtur mangan.
Por Driton Rashiti pret që së shpejti uji i ujësjellësit të bëhet i pijshëm.
Por për dikë, e hëna ishte dita e parë që mori ujë në këtë vend.
Derisa nga Instituti Kombëtar i Shëndetësisë Publike kanë bërë të ditur se vlerat e manganit ka filluar të bijen në analizat e fundit.
“Analizat e fundit laboratorike tregojnë për rënie të vlerave referente të manganit në ujin e liqenit dhe në rrjetin shpërndarës, por që, ende nuk janë arritur vlerat sipas standardeve të parapara në Udhëzimin administrativ nr. 10/2021 – Cilësia e Ujit për konsum nga njeriu”, ka njoftuar Instituti Kombëtar i Shëndetësisë Publike përmes një njoftimi në Facebook.
Kurse nga Kompania Rajonale e Ujësjellësit përmes një përgjigje elektronike kanë bërë të ditur se gjendja e krijuar nuk është alarmante.
“Ne si KRU” Prishtina” jemi duke bërë përpjekje maksimale për ti furnizuar qytetaret me ujë te pijshëm përmes autoboteve ne zonat e prekura. E kemi edhe obligim ligjor. Shpresojmë qe situata te përmirësohet shume shpejt. Gjendja nuk është alarmante”, është shprehur zëdhënësja e Ujësjellësit “Prishtina”, Arjeta Mjeku.
Përveç në Hjavali, këto autobot ishin vendosur edhe në pjesë tjera të Prishtinës e në Graçanicë.
