Në Ditën Botërore të Lirisë së Shtypit, Asociacioni i Gazetarëve të Kosovës (AGK) ka shprehur shqetësimin për gjendjen e gazetarëve në vend, duke theksuar se ata vazhdojnë të jenë cak i sulmeve dhe presioneve të ndryshme.
Në deklaratën e publikuar, AGK vlerëson se gazetarët përballen me sfida të shumta në ushtrimin e profesionit, ndërsa thekson një fushatë të vazhdueshme nga Qeveria e Kosovës dhe partia në pushtet, Vetëvendosje, për delegjitimimin e punës së tyre.
“Gazetarët dhe mediat mbesin cak i sulmeve përmes gjuhës denigruese, e cila synon të ulë besimin e publikut në raportimet e tyre”, thuhet në reagim.
AGK u ka bërë thirrje institucioneve dhe të gjithë akterëve politikë që të respektojnë dhe të mos pengojnë punën e gazetarëve, duke e konsideruar atë thelbësore për zhvillimin demokratik të vendit.
Në të njëjtën kohë, asociacioni ka shprehur shqetësim për mënyrën e përzgjedhjes së anëtarëve të bordeve të RTK-së dhe KPM-së, duke e cilësuar procesin si të shpejtë dhe të komprometuar, me tendencë për ndikim politik.
Megjithatë, AGK ka përshëndetur përmirësimin e Kosovës në Indeksin e Reporterëve Pa Kufij, duke e lidhur këtë me vendimet e Gjykatës Kushtetuese, e cila shpalli antikushtetues Ligjin për KPM-në.
Sipas tyre, sistemi gjyqësor mbetet një nga garantuesit kryesorë të lirisë së medias, ndërsa kërkohet edhe ashpërsim i politikave ndëshkimore ndaj sulmeve ndaj gazetarëve.
