Komisioni Disiplinor i Federatës së Futbollit të Kosovës (FFK) nuk ka marrë vendim për Ferizajn.
Nga klubi i Ferizajt është kërkuar deklaratë shtesë për hedhjen e gjësendeve dhe mjeteve piroteknike në fushë, që rezultoi me ndërprerje të ndeshjes në tri raste. Ndeshja ndaj Dukagjinit në fundjavë u shty për 17 minuta nga gjyqtari kryesor, Mervan Bejtullahu.
“Në minutat 1, 16 dhe 49 hodhën mjete piroteknike në fushën e lojës, për çka ishte ndërprerë ndeshja për disa minuta, ndërkaq në minutën 90+5, hodhën gjësende të ndryshme në fushë, për çka ishte ndërprerë ndeshja për dy minuta. Në minutën 90+10, pas anulimit të golit të Ferizajt, simpatizuesit vendas hodhën gjësende në drejtim të asistentit të dytë, për çka ishte ndërprerë ndeshja për dy minuta. Sipas protokollit zyrtar të ndeshjes Ferizaj-Dukagjini.
Bazuar në nenin 32 paragrafi 1 të Rregullores disiplinore kërkohet deklaratë shtesë nga përfaqësuesi për siguri i FC Ferizaj”, shkruan në arsyetimin e KD të FFK-së.
Ndeshja Ferizaj – Dukagjini është duke u hetuar për kurdisje. Goli i pranuar nga Dukagjini, përkatësisht portieri Altik Muhaxhiri ishte shumë i dyshimtë.
Ai nuk tentoi ta pengonte gjuajtjen me kokë të Astrit Fazliut. Edhe ndeshja Trepça ’89 – Prishtina është duke u hetuar me dyshimin për kurdisje. Si Ferizaj ashtu edhe Trepça ’89 fituan ndeshjet e tyre me rezultatin 2:1. Fitoret i arritën në fund të takimeve.
Ferizaj me fitore siguroi barazhin, kurse 89-shi nuk arriti të mbijetoj në elitën e futbollit kosovar. Sezonin e ardhshëm do të paraqitet në Ligën e Parë.
