Komisioni Disiplinor i Federatës së Futbollit të Kosovës (FFK), ka marrë masa ndaj kampionit të Kosovës, Ballkanit dhe kryetarit të këtij klubi, Arsim Kabashit.
Të martën, KD-ja pranë FFK-së, e ka gjobitur ekipin e Ballkanit me 1.300 euro kurse kryetarin Kabashi me 600 euro.
Ballkani është gjobitur për lëshim në organizimin e ndeshjes, ndërsa kryetari Kabashi për dyshim se ka sulmuar trajnerin e ekipit mysafir. Këto gjoba ndaj ekipit nga Suhareka, kanë ardhur për shkak të incidentit të ndodhur pas ndeshjes të xhiros së 34-të ndërmjet Ballkanit dhe Fushë Kosovës.
Pas ndeshjes trajneri i Fushë Kosovës, Burim Shala është ankuar se ishte sulmuar nda zyrtarët e Ballkanit.
Ndërkohë, mesfushori i Llapit, Besar Musolli është dënuar me dy ndeshje moslojë për shkak të ndëshkimit me karton të kuq në ndeshjen kundër Ballkanit, e cila i takoi xhiros së 35-të.
