Disa persona kanë humbur jetën dhe disa të tjerë janë plagosur rëndë pasi një zjarr i madh shpërtheu të mërkurën në një ndërtesë 10-katëshe banimi në lagjen Linkeroever të Antwerpit, Belgjikë.
Policia konfirmoi se pati viktima, ndërsa ekipet e shpëtimit vazhdojnë kërkimet në ndërtesë.
“Ka disa të plagosur rëndë dhe disa të plagosur lehtë. Fatkeqësisht, ka edhe një numër viktimash, por nuk mund të themi se sa në këtë moment. Prioriteti tani është kërkimi i njerëzve në ndërtesë dhe ofrimi i kujdesit mjekësor”, tha zëdhënësja e policisë Kim Bastiaens.
Më shumë se 200 persona jetojnë në kompleksin e apartamenteve, ndërsa evakuimi dhe operacionet e kërkim-shpëtimit vazhdojnë.
Autoritetet u kanë bërë thirrje banorëve të mbajnë dritaret dhe dyert e mbyllura dhe të shmangin zonën. Shkaku i zjarrit nuk është përcaktuar ende.
